ខែរះឆ្លងផ្លូវ កូនកើតមុនឪ ពតាដើរលេង

កិច្ចវិភាគ

“ខែរះឆ្លងផ្លូវ កូនកើតមុនឪ ពតាដើរលេង”

ទន្ទឹមនឹងពាក្យបីឃ្លាខាងលើ យើងក៏ធ្លាប់ឮដែរ ឃ្លាមួយទៀតគឺ៖

“ខែរះទទឹងផ្លូវ កូនកើតមុនឪ ពតាដើរលេង” .... ឃ្លាទាំងពីរនេះមានបំណងសារៈតែមួយ ។ ដូច្នេះខ្ញុំសូមសាកល្បង

ធ្វើការវែកញែកនូវបុរាណភាសិតនេះ ដូចខាងក្រោមៈ

“ខែ” គឺជាអច្ឆរិយវត្ថុនៃលោកធាតុ បំភ្លឺរស្មីរបស់ខ្លួនតែក្នុងពេលណាដែលគ្មានពន្លឺ ឬមានភាពងងឹត(រាត្រីកាល) ។
“រះឆ្លងផ្លូវ ឬទទឹងផ្លូវ “ ដើម្បីទាញអត្ថន័យឲ្យដឹងថាតើ “ឆ្លងផ្លូវឬទទឹងផ្លូវ” ដូចម្ដេចនោះ  យើងដឹងហើយថា

ព្រះចន័្ទរះពីទិសខាងកើត ធ្វើដំណើរឆ្ពោះទៅទិសខាងលិច តែមួយគន្លងប៉ុណ្ណោះ ។ ដូច្នេះន័យនៃពាក្យថា

“ឆ្លងផ្លូវ ឬទទឹងផ្លូវ”នេះ ចង្អុលបង្ហាញថាផ្លូវដែលព្រះចន្ទ័ដើរឆ្លង ឬឆ្លងកាត់នោះ គឺត្រូវតែមានទិស “ពីខាងជើង

ឆ្ពោះទៅទិសខាត្បូង”  ព្រោះបើផ្លូវមានទិសស្របគ្នានឹងគន្លងព្រះចន្ទ័  នោះឥតមានអ្នកណាឆ្លងកាត់អ្នកណាឡើយ។

នេះសង្ខេបអត្ថន័យនៃពាក្យត្រង់ នៃឃ្លា“ខែរះឆ្លងផ្លូវឬទទឹងផ្លូវ”តែប៉ុណ្ណេះ ។

“កូនកើតមុនឪ  ពតាដើរលេង” ដោយគ្រាន់តែអាន ក៏យើងយល់ដែរហើយថា នេះមិនមែនជាន័យ
នៃអត្ថានុរូបឡើយ -- ឪពុកបង្កើតកូន  តាពចៅ ។ បេសកៈកម្មរបស់យើងគឺ  ស្វែងរកន័យរបស់

“អត្ថប្បដិរូប” ថាតើមានន័យដូចម្ដេច?

“ខែ ឬព្រះចន្ទ័” តែមួយដួង អាចជះពន្លឺបំព្រាងស្បៃអន្ធិកា(ភាពងងឹត)បាន។ ពន្លឺ លោកសំដៅទៅលើ

ចំណេះវិជ្ជាផ្សេងៗ ដែលបុគ្គលរូបណាមួយបានសិក្សាដល់កម្រិតចម្បងហើយ ហើយយកចំណេះវិជ្ជាទាំងនោះ

មកសាបព្រោះបណ្ដុះបណ្ដាល បំភ្លឺដល់ជនឯទៀត ទោះជាសង្គមគ្រួសាររបស់ខ្លួនក្ដី សង្គមជាតិរបស់ខ្លួនក្ដី ។

“រះឆ្លងផ្លូវ ឬទទឹងផ្លូវ” កាលបើយើងស្ថិតក្នុងភាពងងឹត ឬអវិជ្ជាទាំងអស់គ្នា នោះយើងពុំអាចឆ្វេងយល់ វាស់វែងបាន

ថាតើ អ្វីជាទទឹង ឬបណ្ដោយបានឡើយ  លុះត្រាណាតែមានអ្វីមួយយកធ្វើជាគន្លង។ ក្នុងទីនេះ ចាស់លោកយក

”ពន្លឺ គឺវិជ្ជា”ជាគន្លងកំចាត់កាត់ភាពងងឹត គឺផ្លូវអវិជ្ជានេះឯង។

“កូនកើតមុនឪ” ន័យក្នុងទីនេះ លោកសំដៅលើ “កំណើតនៃវិជ្ជា ឬពន្លឺ” ដែលឪពុកខកខានពុំបានចាប់យកដោយ

កាលៈទេសៈ ឬស្ថានភាពជីវិតរបស់គាត់ផ្សេងៗ ។ បច្ចុប្បន្ន យើងឃើញមានគ្រួសារខ្មែរជាច្រើនដែលស្ថិតក្រោម

អត្ថន័យនេះ ... កូនប្រុស ស្រី របស់គាត់បានសិក្សារៀនសូត្រទទួលបានបរិញ្ញាបត្រ័ ថ្នាក់(ត្រី) (ទោ)(ឯក)ជាដើម

ប្រចាំគ្រួសារគាត់ជាលើកដំបូងបំផុត ដែលគាត់ខកខាន ឬឥតមានសិក្ខាសម្បត្តិនេះ ។ ន័យមួយទៀតធៀបដូច

អ្នកប្រាជ្ញជំនាន់ក្រោយៗ កើតគំនិតកោសល្យកាន់តែច្បងទៅៗ ជុំវិញវិជ្ជាគ្រប់វិស័យដែលអ្នកប្រាជ្ញមុនៗពុំបាន

យល់ដល់ ដូចជាមានប្រពន្ធ័ Internet នេះជាដើម ។ នេះហើយគឺជាអត្ថន័យ “កូនកើតមុនឪ”!

“ពតាដើរលេង” កាលបើអ្នកបានសម្រេចការសិក្សាចម្បង ដែលលោកប្រៀបបានទៅនឹង”ពន្លឺ”ហើយ ...

ទោះជាទីណាក្ដីដែលអ្នកត្រេចទៅ  អ្នកពាំនាំយកនូវពន្លឺកិត្តិយសរបស់អ្នក ទៅជាមួយគ្រប់ទិសទី ។ នៅបស្ចឹមប្រទេស

គេប្រគល់កិត្តយសនោះត្រង់ៗតែម្ដង ...ឧទាហរណ៍ៈ បើឈ្មោះរបស់អ្នក “ជ័យ” ហើយត្រកូលជីតារបស់អ្នក “វរ្ម័ន”

នោះប្រជាផងនឹងហៅអ្នកថា “បណ្ឌិត វរ្ម័ន” គ្រប់មាត់ គ្រប់ទិសទីដោយគារវៈ! ។

“ព” ជាកិរិយាស័ព្ទ មានន័យថា៖ ចាប់លើកឡើង ស្ទួយឡើង មកភ្ជាប់ផ្អោបនឹងប្រាណ ។ ទោះជាអ្នកចាប់អារម្មណ៍ក្ដី មិនបានគិតដល់ក្ដី ទីណាដែលអ្នកត្រេចចរទៅ  អ្នកបាននាំជីតារបស់អ្នកធ្វើដំណើរទៅជាមួយ ស្ទួយតម្កើង ភ្ជាប់ជាមួយ

ឈ្មោះរបស់អ្នកផងដែរ ​ ដូចជា  “បណ្ឌិត ជ័យ  វរ្ម័ន” ។

ប៊ី ប៊យ

12/26/2010