ត្រុកៗអ្នកស្រុកមើលងាយ គ្រលាស់គូថខ្ចាយមានឱតមានភ័ន្ត

“ត្រុកៗអ្នកស្រុកមើលងាយ គ្រលាស់គូថខ្ចាយមានឱតមានភ័ន្ត”

ពំនោលនេះលោកចង់ចង្អុលបង្ហាញពីចំណុចពីរគឺ៖

១)ចរិតបន្ទាបខ្លួនជាសាមញ្ញក្នុងសង្គម មិនជាទីចាប់អារម្មណ៍ពីអ្នកផង ដូចជាមឹះៗ ទ្រុយៗជាដើម

២)សំនួនវោហារ ប្រាជ្ញាឈ្លាសវៃ សម្ដែងឡើងក្នុងទីប្រជុំជនជាផ្លូវការណាមួយ ដែលបណ្ដាលឲ្យ

អ្នកស្រុកមានការស្រឡាំងកាំងជាដើម ដ្បឹតនឹកស្មានមិនដល់ ឬក៏យើងអាចនិយាយបានថាចរិយា

ខាងក្រៅ(ត្រុកៗ) ផ្ទុយនឹងប្រាជ្ញាកោសល្យខាងក្នុងរបស់ជនណាមួយ(ដែលមានថ្វីគំនិតផ្លេកចិញ្ចែង) ដែលអ្នកស្រុកទើបតែបានឃើញ។

ឱតៈ បន្លឺសូរស័ព្ទឡើង  បន្ទរសម្លេងឡើង

ភ័ន្ត   មានន័យថា យល់ច្រឡំ  ស្រឡាំងកាំង

“គ្រលាស់គូថ ឬគ្រលែងខ្លួនខ្ចាយ” សំដៅទៅលើសកម្មភាព  ឬកោសល្យដែលបានសម្ដែងឡើង

“មានឱត” បណ្ដាលឲ្យមានឧទ្ទានស័ព្ទឡើង

“មានភ័ន្ត” ការស្រឡាំងកាំង ភាំងអារម្មណ៍ ដ្បឹតយល់ច្រឡំ ឬបានសន្និដ្ឋានខុស

ប៊ី ប៊យ

12/27/2010